👋 احنا مين؟

احنا تيم صغير، بس قلبه كبير 💛 فينا اللي بيشتغل في الكول سنتر الألماني من سنين، وبيسمع مكالمات زمايله كل يوم ويقيّمها، وعارف الموظف الشاطر بيتكلم إزاي. وفينا تيم ليدرز شافوا ناس كتير بتدخل الإنترفيو وهي خايفة. وفينا ناس سافرت ألمانيا فعلاً، وعارفة التقديمات بتتعمل إزاي، وعارفة النصّابين بيصطادوا الناس منين. وطبعاً المصمم الجميل اللي حوّل كل المشاكل دي لحلول 🎨

💡 ليه عملنا Deutsch Reise؟

لأننا شفنا نفس الحكاية بتتكرر كل يوم:

• طالب جديد عايز يبدأ، ومش عارف يبدأ منين، ووسط ألف كورس وفيديو.
• واحد بيحضّر لامتحان Goethe، ومش لاقي تدريب شبه الامتحان الحقيقي.
• واحد شغال في الكول سنتر، والألماني بتاعه بدأ يتمحي من كتر الروتين.
• وواحد حلمه أوسبيلدونج أو ماستر في ألمانيا، وخايف يقع في إيد نصّاب.

كل دي أحلام ناس كتير. فقلنا: نعمل حاجة واحدة تمشي مع كل واحد فيهم من أول خطوة لحد آخرها. ببلاش في الأول، وعلى قدّه هو، ومن غير وعود كدّابة.

🧭 مبادئنا

• الجد: خطة يومية صغيرة أحسن من حماس يوم واحد.
• الهزار: الألماني صعب، فلازم نضحك شوية 😄
• الثقة: مش بنوعد بشغل ولا بفيزا. بنوعدك إنك هتتعلم بجد.
• الانتظام: 10 دقايق كل يوم بتعمل فرق أكبر من 3 ساعات مرة في الأسبوع.

✅ مين بيراجع المحتوى؟

بنكتب ونراجع كل سؤال وكل جملة على معايير Goethe والإطار الأوروبي للغات (CEFR)، وناس بتتكلم ألماني في شغلها كل يوم بتراجعها قبل ما توصلك.

🙏 شكر

المنصة دي ماكانتش هتطلع من غير ناس كتير وقفوا جنبنا، وجرّبوا، وقالوا رأيهم بصراحة 💛

• أخونا الكبير مستر محمد أشرف، اللي دايماً بيوجّهنا وبيرجّعنا للطريق الصح.
• وشكر خاص للمصمم يونس في بلاد الشوق، اللي دماغه روعة، وحوّل كل فكرة لحاجة تتشاف وتتحب 🎨
• ولكل اللي ساعدونا من غير ما يطلبوا يتكتب اسمهم: انتوا عارفين نفسكم 🙏

وبفضل الله هنكمّل.

✉️ اتصل بينا

عندك سؤال أو فكرة أو لقيت غلطة؟ ابعتلنا على [email protected]